IP4Startups – Programi që do të fuqizojë sipërmarrjet e reja nëpërmjet Mbrojtjes së Pronësisë Intelektuale
IP4Startups – Programi që do të fuqizojë sipërmarrjet e reja nëpërmjet Mbrojtjes së Pronësisë Intelektuale
Ekosistemi shqiptar i startupeve dhe inovacionit po transformohet në mënyrë eksponenciale. Megjithatë Pronësia Intelektuale dhe Industriale është një tematikë, mbi të cilën startupet ende kanë nevojë të informohen. Nëpërmjet programeve të akselerimit mbi Pronësinë Intelektuale dhe Industriale, sipërmarrjet në Shqipëri mund të rrisin potencialin e zhvillimit ekonomik dhe inovacionin për ta pozicionuar Shqipërinë si një qendër e avancuar e inovacionit për rajonin.
Mbrojtja e Pronësisë Intelektuale dhe Industriale të një Startupi përpos regjistrimit të markës apo patentimit, përfshin një strategji brendimi dhe mbrojtje të mirëfilltë në rast të shkeljes së të drejtave. Programi “IP4Startups”, i cili do të mbështetë drejtpërsëdrejti disa startupe shqiptare mbi Pronësinë Intelektuale dhe Industriale implementohet nga Drejtoria e Përgjithshme e Pronësisë Industriale (DPPI) me mbeshtjetjen e Projektit Shqiptaro-Zviceran për pronësinë Intelektuale (ALSIP).
Qëllimi i programit IP4Startups është të mbështesë 10 startupe shqiptare të arrijnë potencialin e tyre dhe t’u ofrojë mbështetje të personalizuar për të regjistruar dhe mbrojtur në mënyrë efektive asetet e tyre të pronësisë intelektuale dhe industriale duke përfshirë: ngritjen e kapaciteteve, konsulencë të personalizuar, regjistrimin pa pagesë të markave tregtare për subjektet e tyre dhe hartimin e paketave të brendimit ose ribrendimit, për të patur avantazh konkurrues dhe diferencim në treg.
Rreth Programit
IP4Startups do të ofrojë një program intensiv akselerimi të dedikuar për të adresuar nevojat specifike të startupeve. Startupet e përzgjedhura do të kenë akses në një sërë burimesh dhe mekanizmash mbështetës, që synojnë rritjen e të kuptuarit mbi pronësinë intelektuale dhe zbatimin e strategjive efektive të saj për një rritje të qëndrueshme. Me qëllim adresimin e nevojave specifike, pjesëmarrësit do të gjejnë udhëzime dhe mbështetje duke nisur që nga hartimi i strategjive të rritjes dhe brendimit, regjistrimit të markës deri te menaxhimi i pronësisë intelektuale. Programi synon të mbështesë 10 startupe në Shqipëri, të cilët do të përfitojnë pa pagesë mbështetje të personalizuar përgjatë programit.
Çfarë ofron programi:
- Workshope/ trajnime: Startupet do të marrin pjesë në workshope informuese mbi markën, pronësinë intelektuale dhe tematika të ndryshme të lidhura me mbrojtjen e pronësisë intelektuale;
- Diagnostifikimi i Pronësisë Intelektuale dhe Industriale (WIPO IP diagnostics);
- Raport i personalizuar nga DPPI: Një raport i personalizuar paraprak nga DPPI mbi asetet e pronësisë intelektuale të secilit startup dhe strategjisë së brendimit;
- Paketa e personalizuar e brendimit/ribrendimit: Secili startup i programit do të përfitojë mbështetje të personalizuar “Branding/Rebranding Package”;
- Sesione mentorimi të dedikuara: Ekspertët e programit do të ofrojnë sesione mentorimi të dedikuara për startupet e programit;
- Regjistrimi i markës: Mbështetje e drejtpërdrejtë për regjistrimin dhe mbrojtjen e markës;
- Networking: Evente rrjetëzimi, akses në investitorë, mentorë, donatorët e projektit dhe aktorë të rëndësishëm të ekosistemit të startupeve për të nxitur bashkëpunime të reja.
- Startupet duhet të jenë të regjistruara në Shqipëri dhe të pajisura me NIPT;
- Të jenë në fazat e hershme të zhvillimit (nga 6 në 36 muaj);
- Të kenë potencial rritje dhe zgjerimi në tregjet rajonale/internacionale;
- Të kenë zgjidhje inovative që kanë të inkorporuar teknologjitë e reja digjitale;
- Aplikantët duhet të kenë të paktën një Minimum Viable Product (MVP) ose një prototip të demonstrueshëm. Avantazh përbejnë Startupet që janë në fazën e lançimit/shitjes së produkteve të tyre;
- Të përbëhen nga ekipe dinamike, me CV të pasur dhe të përkushtuara për t’u angazhuar në çdo aktivitet të parashikuar në program.
- Të kenë adresuar nevojat dhe sfidat lidhur me Pronësinë Intelektuale dhe Industriale në mënyrë sa më të qartë dhe konkrete.
Filloi cikli i trajnimeve për fituesit e StartUP-ve nga DPPI dhe Agjencia e Startapeve
U organizua cikli i parë i trajnimeve nga Drejtoria e Përgjithshme e Pronësisë Industriale në bashkëpunim me Agjencinë e StartUp-ve dhe Drejtorinë për të Drejtën e Autorit.
Cikli i trajnimeve vjen si rrjedhojë e marrëveshjes së bashkëpunimit që DPPI ka me Agjencinë e StartUp-ve. Qëllimi i këtij trajnimi është prezantimi i fushës së pronësisë intelektuale tek fituesit e start-up përpara se produktet e tyre të dalin në treg dhe rëndësinë e jashtëzakonshme që ka regjistrimi i tyre.
E Drejta e Autorit së bashku me Pronësinë Industriale janë dy shtyllat e pronësisë Intelektuale.
Lektorët dhe ekspertët sqaruan me detaje nga procesi i regjistrimit deri tek mbrojtja e objektit të Pronësisë Industriale.
U njohën me objektet e pronësisë intelektuale, mënyra se si regjistrohen dhe rëndësinë e regjstrimit të këtyre objekteve
Është shumë e rendësishme që në hapat e parë të një biznesi me idenë e sukseshme për arritjen e të mirave financiare të një produkti në treg, automatikisht të regjistrohet edhe identiteti në treg.
Programi i trajnimit përmbante këto tema:
• “Të njohim fushën e pronësisë intelektuale dhe të drejtat që burojnë nga regjsitrimi i objekteve të saj”,
• “Të drejtat e Autorit dhe të drejtat lidhur me të”,
• “Proçedurat e regjistrimit të markës tregtare dhe Proçedurat e regjistrimit të disenjos industriale”,
• “Si mbrohen patentat dhe modelet e përdorimit në Republikën e Shqipërisë, kushtet dhe procedurat e regjsitrimit”
• “Mbrojtja ndërkombëtare e objekteve të PI-së”,
Të pranishmit në ciklin e parë të këtij trajnimi u shprehën entuziastë mbi cilësinë dhe sasinë e informacionit të dhënë për ta dhe se sa e rëndësishme është regjistrimi i objekteve të pronësisë industriale dhe intelektuale që në fazat e para të konceptimit të sipërmarrjes. Ky cikël trajnimesh u bë i mundur falë mbështetjes së Agjencisë së Startupeve dhe do të vijojë deri në fund të vitit sipas një kalendarintë miratuar.
Startoi sot kohorta e pare e programit IP4Startups për fuqizimin e sipërmarrjeve të reja nëpërmjet Mbrojtjes së Pronësisë Intelektuale
10 startup-et e përzgjedhura për të qenë pjesë e këtij program të parë filluan rrugëtimin dy mujor, ku u njohën me strukturen e programit, modulet, ekspertët e përfshirë në module të ndryshme si Pre-Diagnostic Wipo, Gjenerimi i raporteve të personalizuara, Branding, Promotional Labeling, Advertising, Enforcement, Economic benefits, International & Local Trademark registration etj.
Programi “IP4Startups”, i cili do të mbështesë drejtpërsëdrejti kohortën e parë prej 10 startupe shqiptare mbi Pronësinë Intelektuale dhe Industriale, implementohet nga Drejtoria e Përgjithshme e Pronësisë Industriale (DPPI) me mbeshtjetjen e Projektit Shqiptaro-Zviceran për pronësinë Intelektuale (ALSIP)
30 vjetori i krijimit të Drejtorisë së Përgjithshme të Pronësisë Industriale
30 vjet Institucion!
30 vjet përpjekje!
30 vjet angazhim!
Me rastin e 30 vjetorit të themelimit të Drejtorisë së Përgjithshme të Pronësisë Industriale u mbajt në mjediset e Hotel Plaza Tiranë Konferenca Ndërkombëtare dy- ditore me temë “Women in Tradition, Innovation, Creativity and Entrepreneurship” me pjesëmarrjen e krerëve më të lartë të 3 organizatave ndërkombëtare të Pronësisë Intelektuale, z. Habip Asan- Organizata Botërore e Pronësisë Intelektuale (WIPO), z. Christoph Ernst, zv. President në Zyrën Europiane të Patentave (EPO) si dhe z. Injacio De Medrano – Zyra e Bashkimi Europian e Pronësisë Intelektuale (EUIPO), pjesëmarrjen e zv.Ministrit të Financave dhe Ekonomisë Znj. Adela Xhemali, Ministrit të Shtetit për Sipërmarrjen, Znj. Delina Ibrahimaj si dhe zv. Ambasadorit të Ambasadës së Zvicrës në Tiranë, Z. Philip Arnold.
Drejtori i Përgjithshëm i DPPI, Znj. Rovena Beqiraj, uroi mirëseardhjen të ftuarve, partnerë të fushës, kontribues ndër vite, ish-drejtues, institucione ligjzbatuese, përfaqësues të institucioneve të arsimit të lartë, si dhe përfaqësues nga Zyra homologe të PI në rajon dhe më gjerë.
Në fjalën përshëndetese Zëvendësministri i Financave dhe Ekonomisë znj. Adela Xhemali theksoi rolin e Pronësisë Intelektuale si një tregues i rëndësishëm në zhvillimin e ekonomisë të vendit.
Drejtori i Përgjithshëm i Organizatës Botërore të Pronësisë Intelektuale z. Daren Tang në një mesazh regjistrimi uroi 30 vjetorin e krijimit të DPPI-së dhe vlerësoi arritjet e deritanishme të saj, duke e cilësuar Shqipërinë një vend me progres në fushën e pronësisë intelektuale.
#Wipo#epo#euipo
Seminari Kombëtar “IP4 Youth & Teachers”
Në kuadër te zbatimit të Strategjisë Kombëtare të Pronësisë Intelektuale 2022-2025 ” u zhvillua sot dita e parë e Seminarit Kombëtar -ditor “IP4 Youth & Teachers” në ambientet e Hotel Tirana International si një nga aktivitetet e planifikuara për trajnimin e mësuesve te ciklit parauniversitar në fushën e Pronësisë Intelektuale. Ky aktivitetet u mbështet nga Organizata Botërore e Pronësisë Intelektuale (WIPO) në bashkëpunim me Zyrën Koreane te Pronësise Intelektuale (KIPO) dhe Drejtorisë së Pergjithshme të Pronësisë Industriale.
Në fjalën e saj përshëndetëse Drejtori i Pergjithshëm znj. Rovena Beqiraj uroi mirëseardhjen të ftuarve dhe theksoi rendësine e këtij trajnimi për mësuesit të sistemit parauniversitar, si një indikator shumë i qëndrueshëm në edukimin e brezave të rinj në fushën e pronësise intelektuale. Lektorët pjesëmarres në këtë event ishin ekspertë ndërkombëtare me një eksperiencë të konsiderueshme në fushën e pronësise intelekuale:
- Hani AJI, Ekspert i Asociuar, Programi i të mësuarit në distance, Akademia e OBP
- Paata Papava, Ekspert i Pedagogjise, Gjeorgji
- Leonid Chechurin, Universiteti i Shkencave Inxhinierike (LUT) Finlandë
- Eman Ibrahim, Trajner i Pl dhe Ekzaminues i Patentave, Zyra e Patentave te Egjiptit
- Chanda Tembo, Ekspert, Zambia
Gjatë ciklit të trajnimit u prezantuan shembuj konkrete se si të nxisim krijimtarinë përmes të mësuarit të PI, biseda ndërmjet mësuesve rreth të mësuarit te PI duke e bërë mjaft interesante dhe interaktive proçesin e trajnimit.
Vizita në 30-vjetorin e themelimit të Entit Shtetëror për Pronësi Industriale, të Maqedonisë së Veriut
Në këtë ngjarje të veçantë të 30-vjetorit të themelimit të Entit Shtetëror për Pronësi Industriale, të Maqedonisë së Veriut, dhe me ftesë të Drejtorit të Përgjithshëm të këtij institucioni Z. Blerim Idrizi, jemi krenarë të përfaqësojmë Drejtorinë e Përgjithshme të Pronësisë Industriale të Republikës së Shqipërisë kryesuar nga Drejtori i saj znj. Rovena Beqiraj.
Bashkë me një sërë zyrash homologe të fushës së Pronësisë Industriale, si Kosova Bullgaria Sllovenia dhe Serbia kishim privilegjin të marrim pjesë në këtë ngjarje të rëndësishme, duke theksuar dhe njëherë marrëdhëniet shumë të mira bilaterale midis dy zyrave tona.
Përfaqësimi ynë është një shprehje e përkushtimit tonë në promovimin dhe avancimin e inovacionit dhe kreativitetit në rajonin tonë. Ndërkaq, praninë tonë këtu e bën ngjarjen të pasuruar nga eksperiencat dhe praktikat më të mira në fushën e Pronësisë Industriale.
Ngjarja është një mundësi e jashtëzakonshme për të ndarë njohuritë tona, për të mësuar nga përvojat e tjera dhe për të forcuar lidhjet e bashkëpunimit ndërkombëtar në këtë sferë të rëndësishme. Vazhdojmë të punojmë me përkushtim për të ndihmuar në zhvillimin dhe avancimin e mjedisit tonë inovativ dhe për të kontribuar në krijimin e një baze më të fortë për progresin e teknologjisë dhe inovacionit në Shqipëri dhe në rajonin tonë.” I urojmë gjithë stafit të ESHPI gëzuar ditëlindjen e 30 të themelimit të këtij institucioni dhe shumë suksese në rrugëtimin e mëtejshëm.