Nënshkruhet Marrëveshja e Bashkëpunimit midis Drejtorisë së Përgjithshme të Pronësisë Industriale, përfaqësuar nga Drejtori i Përgjithshëm znj. Rovena Beqiraj dhe Universitetit “Eqerem Çabej” përfaqësuar nga Rektori Z. Bektash Mema.
Qëllimi i nënshkrimit të kësaj marrëveshje, është ngritja e Qendrës së Informacionit Tekniko- Shkencor pranë këtij universiteti, edukimin e të rinjve në fushën e pronësisë industriale duke nxitur krijimtarinë dhe inovacionin, si dhe zhvillimin e aktiviteteve të përbashkëta si seminare, konferenca, ekspozita, trajnime të ndryshme që kanë për qëllim ndërgjegjësimin e studentëve, stafit akademik dhe kërkimor-shkencor për rolin që ka mbrojtja e të drejtave mbi shpikjet në zhvillimin e shkencës dhe teknologjisë në vend.
Me këtë rast, përfaqësuesit e DPPI ofruan një orë leksioni informative në fushën e pronësisë intelektuale dhe industriale duke u fokusuar me shumë te patentat për shpikje.
Gjithashtu studentët u njohën me ESPASNET – një motor kërkimi në gjuhën shqipe, (bërë i mundur nga bashkëpunimi me Zyrën Europiane të Patentave)ku studentët mund të kërkojnë për shpikje të ndryshme sipas fushave, kërkim i cili mund tu shërbejë për punimet e tyre të diplomës.
Me datë 29.4.2024 në ambjentet e Fakultetit të Drejtësisë, Universiteti i Tiranës, Drejtoria e Përgjithshme e Pronësisë Industriale (DPPI), në bashkëpunim me Inspektoratin Shtetëror të Mbikëqyrjes së Tregut, Drejtorinë për të Drejtën e Autorit (DDA) si dhe profesorë të Fakultetit të Drejtësisë, zhvilluan një leksion të hapur mbi “Kuadri ligjor në fushën e pronësise intelektuale si dhe raste konkrete nga praktika shqiptare”.
Zv.Dekani, Prof.Jonad Bara, pasi përshëndeti organizimin e këtij aktiviteti, vlerësoi rëndësinë e Pronësisë Intelektuale dhe rolin e institucioneve në garantimin dhe mbrojtjen e saj. Në kuadër të bashkëpunimit të vazhdueshëm me këto institucione dhe nxitjes së punësimit për studentët, Zv.Dekani u shpreh optimist për nënshkrimin në të ardhmen të një marrëveshjeje bashkëpunimi me Drejorinë e Përgjithshme të Pronësisë Industriale. Përgjegjësi i Sektorit Ligjor pranë DPPI, Z.Përparim Mezini, paraqiti përpara studentëve një prezantim mbi Pronësinë Industriale, rëndësinë dhe prioritetin që po merr për shpikësit, krijuesit dhe sipërmarrësit e rinj. Z.Mezini trajtoi më në veçanti markat tregtare dhe rëndësinë e tyre për bizneset që operojnë kudo në botë.
Pjesë e panelit ishte dhe përgjegjësja e Sektorit të Pronësisë Intelektuale pranë Inspektoratit Shtetëror të Mbikëqyrjes së Tregut, Znj.Rezarta Rajtja. Znj.Rajtja u shpreh se ky institucion është përgjegjës për inspektimin në fushën e sigurisë së produkteve jo ushqimore për përdorim nga konsumatorët dhe fushën e pronësisë intelektuale. Përveç rolit të këtij institucioni në marrjen e masave administrative për shkelësit e të drejtave, ajo theksoi se janë vetë mbajtësit e të drejtave që vënë në lëvizje organin administrativ.
Nga ana tjetër përfaqësuesi i Drejtorisë së të Drejtës së Autorit, pranë Ministrisë së Kulturës, Z.Emiljano Alla, trajtoi në mënyrë të përmbledhur Ligjin “Për të Drejtën e Autorit dhe tё drejtat e tjera tё lidhura me to”, duke ndalur tek objekti i këtij ligji, subjeket dhe fushën e zbatimit, si dhe detyrat dhe përgjegjësitë e Drejtorisë për të Drejtën e Autorit(DDA) në vendosjen e masave administrative dhe penale ndaj shkelësve të ligjit.
Znj. Xhesika Lulaj, nga Drejtoria e Përgjithshme e Pronësisë Industriale, solli në vëmendje të studentëve raste të praktikës gjyqësore, ku janë konstatuar konflikte në regjistrimin e markave tregtare, si dhe informoi mbi procedurën e ankimit në rast të cënimit të së drejtës së një subjekti, organet kompetente etj.
Leksioni i hapur i mbajtur në Fakultetin e Drejtësisë, nën drejtimin e Dr.Etlon Peppo, ishte një mënyrë e promovimit dhe rritjes së ndërgjegjësimit të studentëve mbi rëndësinë e pronësisë intelektuale dhe masave që parashikon legjislacioni vendas për mbrojtjen e saj.
Më datë 9 Maj 2024 në ambjentet e Fakultetit të Drejtësisë nënshkruam marrëveshjen e bashkëpunimit, ku palët ranë dakord se Pronësia Industriale është një shtyllë e rendësishme për ngritjen dhe zhvillimin e një veprimtarie të qëndrueshme ekonomike.
Marreveshja u nënshkrua nga dy titullarët e institucioneve konkretisht Znj. Rovena Beqiraj, Drejtor i Përgjithshëm i Drejtorisë së Përgjithshme të Pronësisë Industriale dhe Prof. As. Dr. Dorina Hoxha, Dekan i Fakultetit të Drejtësisë.
Qëllimi i kësaj marrëveshje konsiston në zhvillimin e aktiviteteve të përbashkëta si: seminare, konferenca , trajnime brenda vendit, internshipe, leksione te hapura, praktika mësimore apo takime, që kanë për qëllim informimin dhe sensibilizimin e studentëve në fushën e pronësisë industriale.
DPPI, i konsideron Institucionet e Arsimit të Lartë, institucione partnere për të nxitur inovacionin dhe kërkimin shkencor tek brezat e së ardhmes.
Znj. Ledina Alolli, Dekane e Fakultetit të Ekonomisë në Universitetin “Fan S. Noli” të Korçës, mirëpriti përfaqësues nga Drejtoria e Përgjithshme e Pronësisë Industriale (DPPI) për të biseduar nga afër mbi iniciativat që DPPI ndërmerr, me fokus arsimin dhe studentët.
Znj. Alolli shprehu vlerësimin e saj për vëmendjen që i kushtohet gjeneratës së re dhe për vijimin e mëtejshëm të bashkëpunimit ndërmjet dy institucioneve tona.
Gjatë takimit në këtë universitet, patëm kënaqësinë të zhvillonim një orë të hapur leksioni me tematikën: “Si të nxisim studentët për të thelluar njohuritë e tyre në fushën e pronësisë industriale.”
Studentët e profilit ekonomik nga ky universitet ndoqën me kuriozitet dhe u njohën nga afër me fushën e pronësisë intelektuale, degët e saj, institucionet përgjegjëse në rastet e cënimit të të drejtave dhe mbi rëndësinë e regjistrimit te objekteve te saj.
Këto takime zhvillohen në kuadër të Marrëveshjes së Bashkëpunimit qe institucioni yne ka nenshkruar me Universitetin “Fan Noli” Korçë.
Leksioni u përqëndrua mbi burimet dhe parimet kryesore të së Drejtës Ndërkombëtare të PI dhe ndikimet që sjell prona intelektuale në ekonominë globale.
Prof. Cogo u fokusua në parimin e Konventës së Parisit, Konventës së Bernës dhe TRIPS, duke përfshirë trajtimin kombëtar, përparësinë e së drejtës dhe parimin e kombit më të favorizuar, të cilat luajnë një rol të domosdoshëm në mbrojtjen e pronësisë intelektuale.
Prof. Cogo i udhëzoi studentët që të vazhdojnë studimet e tyre Master në të drejtën e Pronësisë Intelektuale dhe Industriale, duke stimuluar interesin e për të mësuar më shumë rreth traktateve ndërkombëtare, ligjet zakonore dhe parimet e përgjithshme të ligjit të njohura nga vendet e zhvilluara.
Ky leksion i hapur, i pari i këtij lloji, u përshendet nga përfaqësues të Drejtorisë së Përgjithshme të Pronësisë Industriale si dhe nga Zëvendës Dekani, i Fakultetit Juridik Prof. Asc.Dr. Jonad Bara.
Drejtoria e Përgjithshme e Pronësisë Industriale, e përfaqësuar nga Drejtori i Përgjithshëm, znj. Maria Solis Kapedani, dhe Universitetit Europian i Tiranes i përfaqësuar nga Administratori z. Tildi Çadri, nënshkruan sot, në mjediset e universitetit, Memorandumin e Bashkëpunimit.
Ky Memorandum do të sjellë përfitime për studentët dhe stafin akademik, kryesisht për Fakultetet e Inxhinierisë, Artet, Shkencat e Drejtësisë, por edhe për DPPI-në dhe për mbrojtjen që vjen me regjistrimin e objekteve të PI-së.
Drejtori i Pergjithshem i DPPI-se Znj. Maria Solis Kapedani u shpreh se ky Memorandum Bashkëpunimi do të hapë rrugën për studentët, jo vetëm në mbrojtjen e pronësisë së tyre intelektuale, por edhe në lidhjen mes universitetit, DPPI-së dhe biznesit.
Nga ana e UET, Administratori z. Tildi Çadri u shpreh se kjo marrëveshje është e mirëpritur dhe se leksionet e hapura dhe internshipet do të zhvillohen në vazhdimësi
Leksion i Hapur për studentët e Fakultetit të Drejtësisë në Universitetin “Luigj Gurakuqi” në Shkodër.
Drejtoria e Përgjithshme e Pronësisë Industriale mbajti një leksion të hapur me studentët e Fakultetit të Drejtësisë në Shkodër, ku u theksua rëndësia e pronësisë industriale në zhvillimin e shoqërisë dhe ekonomisë.
Interesi i shfaqur nga studentët ishte i jashtëzakonshëm, duke reflektuar nevojën për më shumë njohuri dhe angazhim në këtë fushë kaq të rëndësishme.
Ky leksion është pjesë e marrëveshjes së bashkëpunimit ndërmjet DPPI dhe Universitetit të Shkodrës, e cila synon të afrojë studentët me praktikat më të mira në këtë fushë.
Rëndësia e mbrojtjes së pronësisë industriale dhe intelektuale është themelore për nxitjen e inovacionit dhe krijimtarisë, dhe këtë mesazh e përcollëm me entuziazëm tek të rinjtë që do të formojnë të ardhmen ligjore të vendit. Fakulteti i Drejtësisë në Universitetin e Shkodrës zhvillon në kurikulën e saj te detyrueshme lëndën “Pronësia Intelektuale” dhe për vitin 2024 sipas statistikave të këtij fakulteti, 9 studentë kanë mbrojtur temën e diplomës duke zgjedhur fushën e Pronësisë Intelektuale.
Ky është një fakt që na gëzon. Një falenderim shkon dhe për pedagogët e përkushtuar dhe profesionistë të këtij fakulteti.
Është nënshkruar në mjediset e DPPI, marrëveshja e bashkëpunimit mes Drejtorisë së Përgjithshme të Pronësisë Industriale (DPPI) dhe Western Balkans University (WBU).
Kjo marreveshje është nënshkruar nga Drejtori i Përgjithshëm i komanduar i Drejtorisë së Përgjithshme të Pronësisë Industriale znj. Maria Solis dhe Presidentit te WBU, Prof.Dr. Ferdinand Gjana.
Qëllimi i kësaj marreveshjeje është organizimi i leksioneve të hapura dhe aktiviteteve të përbashkëta, simpoziume shkencore, konkurse me studentët e universitetit dhe stafin akademik për ndërgjegjësimin e tyre në fushën e të drejtave të Pronësisë Industriale.
Me studentët e Kolegjit Universitar “Beder”, zhvilluam një orë të hapur leksioni me temë: “Të njohim fushën e pronësisë industriale si dhe të drejtat që burojnë nga regjistrimi i objekteve të saj”. Bashkëbiseduam me studentët e këtij kolegji mbi: Pronësinë Intelektuale, degët e saj dhe institucionet përgjegjëse Objektet e pronësisë Industriale, Mënyrën e aplikimit për regjistrimin e tyre,Përfitimet ligjore që sjell regjistrimi i objekteve pranë drejtorisë sonë.
Gjithashtu studentëve iu vendosën në dispozicion materiale rreth fushës së PI-së.
Prioriteti ynë për arsimin e lartë është vijimi dhe forcimi i bashkëpunimit me universitetet si dhe mbështetje ndaj brezit të ri në zhvillimin e teknologjisë, inovacionit, si dhe kërkimit shkencor. Të tjera orë te hapura leksioni me në fokus pronësinë Industriale na mirëpresin në vitin e ri akademik 2024-2025 me shumë studentë dhe universitete të vendit.
