From May 1, 2022 – Services are offered online.

0800 1993

Open Data
Open Data
July 2026
Home 2026 July
projekt
Projekt

EU4IP-WB: mbështetje e BE-së për forcimin e sistemit të pronësisë industriale në Shqipëri

Nis zbatimi i projektit EU4IP-WB: mbështetje e BE-së për forcimin e sistemit të pronësisë industriale në Shqipëri Drejtoria e Përgjithshme e Pronësisë Industriale (DPPI) ka nisur zbatimin e projektit EU4IP-WB, "Forcimi i të Drejtave të Pronësisë Intelektuale në Ballkanin Perëndimor (WB6) dhe Republikën e Moldavisë", një iniciativë bashkëpunimi ndërkombëtar e bashkëfinancuar nga Komisioni Evropian dhe Zyra e Bashkimit Evropian për Pronësinë Intelektuale (EUIPO). Projekti, që do të zbatohet nga EUIPO në bashkëpunim të ngushtë me Komisionin Evropian, mbulon gjashtë ekonomi të Ballkanit Perëndimor — Shqipërinë, Bosnjë-Hercegovinën, Kosovën, Malin e Zi, Maqedoninë e Veriut dhe Serbinë — si dhe Republikën e Moldavisë. Në Shqipëri, partner kryesor është DPPI. Zbatimi do të zgjasë nga janari 2026 deri në dhjetor 2028, dhe synon të mbështesë vendet partnere në procesin e integrimit në Bashkimin Europian nëpërmjet nxitjes së zhvillimit të sistemeve të pronësisë intelektuale. Projekti fokusohet në katër shtylla kryesore: përafrimin e legjislacionit me *acquis*-in e BE-së, forcimin e kapaciteteve institucionale, zbatimin efektiv të të drejtave të pronësisë intelektuale, si dhe rritjen e ndërgjegjësimit mbi vlerën e pronësisë intelektuale te bizneset dhe të rinjtë. Nëpërmjet këtyre aktiviteteve, EU4IP-WB do të kontribuojë edhe në Planin e Rritjes për Ballkanin Perëndimor, duke lehtësuar tregtinë brenda rajonit dhe me tregun e BE-së. Në kuadër të Planit të Parë të Punës (korrik–dhjetor 2026), për Shqipërinë janë parashikuar disa aktivitete konkrete: - Mbështetje për hartimin dhe zbatimin e akteve nënligjore për dizenjot industriale, në përputhje me acquis-in e BE-së. - Mbështetje për hartimin dhe zbatimin e akteve nënligjore për treguesit gjeografikë(GI), në bashkëpunim të ngushtë me EUIPO-n. - Mbështetje për vlerësimin dhe përditësimin e mjeteve të klasifikimit dhe kërkimit për mallra e shërbime, përfshirë përkthimin e tyre në shqip. Këto aktivitete do të shoqërohen me tryeza konsultimi, seminare pune dhe asistencë teknike të ekspertëve ndërkombëtarë për stafin e DPPI-së dhe aktorët e tjerë të interesuar. Përtej aktiviteteve specifike për Shqipërinë, DPPI do të përfshihet edhe në nisma rajonale, si përafrimi me praktikat e përbashkëta të Rrjetit Evropian të Pronësisë Intelektuale (EUIPN) për regjistrimin dhe ekzaminimin e markave tregtare dhe dizenjove industriale, si dhe në trajnime e shkëmbime eksperience me vendet e tjera të Ballkanit Perëndimor. Zbatimi i projektit EU4IP-WB përfaqëson një hap të rëndësishëm drejt forcimit të sistemit shqiptar të pronësisë industriale, duke ofruar siguri juridike më të madhe për bizneset, krijuesit dhe sipërmarrësit, si dhe duke afruar Shqipërinë më pranë standardeve dhe praktikave të Bashkimit Evropian.
Shkarkoni dokumentin

Read More
0
singapore
Lajm kryesor

Shqipëria aderon në Traktatin e Singaporit mbi të Drejtën e Markave

Drejtoria e Përgjithshme e Pronësisë Industriale (DPPI) njofton se Republika e Shqipërisë ka depozituar më 1 korrik 2026 pranë Organizatës Botërore të Pronësisë Intelektuale (WIPO) instrumentin e aderimit në Traktatin e Singaporit mbi të Drejtën e Markave, i miratuar në Singapor më 27 mars 2006. Sipas njoftimit zyrtar të WIPO-s, Traktati do të hyjë në fuqi për Republikën e Shqipërisë më 1 tetor 2026.

Aderimi në këtë traktat përfaqëson një hap të rëndësishëm në forcimin e sistemit kombëtar të pronësisë industriale dhe harmonizimin e mëtejshëm të legjislacionit dhe praktikave administrative shqiptare me standardet ndërkombëtare në fushën e markave.

Ky zhvillim përbën gjithashtu përmbushjen e një prej angazhimeve të parashikuara në Strategjinë Kombëtare të Pronësisë Intelektuale 2022–2025, e cila synonte zgjerimin e pjesëmarrjes së Shqipërisë në traktatet ndërkombëtare të administruara nga WIPO dhe forcimin e kuadrit ligjor e institucional në fushën e pronësisë intelektuale.

Traktati i Singaporit synon modernizimin dhe thjeshtimin e procedurave administrative që lidhen me regjistrimin dhe administrimin e markave, duke ofruar një kuadër më efikas, më transparent dhe më të përshtatshëm për përdoruesit e sistemit të markave.

DPPI mbetet e angazhuar në zbatimin e prioriteteve strategjike kombëtare dhe në mbështetjen e biznesit, inovacionit dhe konkurrueshmërisë përmes zhvillimit të një sistemi modern dhe efektiv të pronësisë industriale në Republikën e Shqipërisë.

Read More

Read More
0
nairobi
Lajm kryesor

Shqipëria aderon në Traktatin e Nairobit për Mbrojtjen e Simbolit Olimpik

Republika e Shqipërisë ka përmbushur një tjetër angazhim të rëndësishëm të parashikuar në Strategjinë Kombëtare të Pronësisë Intelektuale 2022–2025, duke aderuar në Traktatin e Nairobit për Mbrojtjen e Simbolit Olimpik.

Sipas njoftimit zyrtar të Organizatës Botërore të Pronësisë Intelektuale (WIPO), më 1 korrik 2026, Qeveria e Republikës së Shqipërisë depozitoi instrumentin e aderimit në Traktatin e Nairobit, ndërsa traktati do të hyjë në fuqi për Shqipërinë më 1 gusht 2026.

Aderimi në këtë traktat është rezultat i punës së koordinuar institucionale dhe pjesë e masave të parashikuara në Strategjinë Kombëtare të Pronësisë Intelektuale 2022–2025 për zgjerimin e pjesëmarrjes së Shqipërisë në traktatet ndërkombëtare të administruara nga WIPO, si dhe për forcimin e mbrojtjes së të drejtave të pronësisë intelektuale në përputhje me standardet ndërkombëtare.

Traktati i Nairobit garanton mbrojtjen e simbolit olimpik kundër përdorimit të paautorizuar për qëllime tregtare, duke siguruar respektimin e detyrimeve ndërkombëtare në këtë fushë dhe duke kontribuar në harmonizimin e mëtejshëm të sistemit shqiptar të pronësisë industriale me praktikat më të mira ndërkombëtare.

Drejtoria e Përgjithshme e Pronësisë Industriale mbetet e angazhuar në zbatimin e prioriteteve strategjike të vendit në fushën e pronësisë intelektuale dhe në avancimin e proceseve që mbështesin inovacionin, zhvillimin ekonomik dhe integrimin evropian.

Me këtë aderim, Shqipëria përmbush një tjetër objektiv konkret të Strategjisë Kombëtare të Pronësisë Intelektuale 2022–2025 dhe konfirmon angazhimin e saj për forcimin e sistemit kombëtar të pronësisë intelektuale në përputhje me standardet ndërkombëtare.

Lexoni më shumë

Read More
0